SUJET

Mee as MEGA wär au mega gsi!
Ganz in Rot stolziere mir vo dr Guggä FGS dur d’Fasnecht,
mit Pauke und Trumpete, stolz und keck.

Z Sissech hämmer schynts 800 Joor gfiirt – jä so….- aber wo?
Mee hättä mer welle gseh, ghöre und fyre!
Mee wie d MEGA wär ebbe mega gsi!

Simmer denn „nur“ MEGA? Das froogä mir eus!
Sissech het 2025 vill erläbt - gar kei Froog.

Bim 800 Johr-Jubiläum hätt sich d Gmeind e chli presänter dörfe zeige: Nid nur «mir wei luägä» und hoffä, dass denn d Vereine und d Firmene scho irgendöbbis uf d Bei stellä.

Wünschenswärt wär gsi, vo dr Gmeind für d Gmeind öppis Grosses z’organisierä, wo s ganze Dorf zämä bringt.

Und denn chunnt d MEGA 2025 – e rysigs, mega Fest! Lut, läbig, farbig - eifach mega.

Aber halt! Das isch ebbe d MEGA gsi – nid s Dorffescht «800 Johr Sissech», liebi Gmeind Sissech!

Mee wiä d MEGA hätte mir eus gwünscht. Sache wo glänzä, Lüt wo lachä, Prosecchi wo sprützä und Stimme wo sprächä. Schad - das wär e Chance gsi, z Sissech so richtig z glänzä!

Mee as d MEGA – das hättä mir wellä sii!

Mir as Guggä FGS säge drum:
Merci an alli, wo ahpackt und gliferet händ!

Mee bystürä in das Jubiläumsjohr wär e super Glägeheit gsi, sich as Gmeind Sissech stärker yzbringä; Denn mee as MEGA wär ebbe mega gsi!